'રસ્તેથી' ___ડો હિતેષ એ. મોઢા

એકદા પાછા ફર્યા'તા વગડેથી
ઘર અટુલુ પડી ગયુ ફળીયેથી

છળવા લાગ્યો રૂપાળો શૃંગાર 
ચહેરા ઉતરતા ગયા આયનેથી  

ભાંગરો વાટી નાખ્યો ભવનો
વાત સમજી ન શક્યા ઈશારેથી 

ન બની શકયો ફુગ્ગો પુરેપુરો 
કોથળી જ્યાં ચીરાય પડખેથી

ખુટ્યો ન પ્રવાસ કદી જીવનનો
મળે ના મંઝિલ, ખોટા રસ્તેથી

તટ પર જઉ તો જઉ કઈ રીતે?  
કોઈ સંભળાય છે હજુ તળીયેથી

વૃક્ષો ચણાય ગયા દિવાલોમાં 
બાગ વર્તાયો તુટેલા બાકડેથી 

સૂરા મને પી ગયો, સાંજ ઉમેરી
કોઈની, તરસ છીપી મયકદેથી 

રક્તમાં છે ખારાશ હજુ ભી હિતુ 
અમથુ કોઈ આવ્યુ હતુ દરિયેથી 


ડો હિતેષ એ. મોઢા
10/01/2015