''મળવા આવે છે''_____ડો હિતેષ એ. મોઢા

કોઈ, વાયદા કેરો વિસ્તાર લઈ મળવા આવે છે
કાલનુ પણ તાજુ અખબાર લઈ મળવા આવે છે

અષાઢી મેઘ જેવો હાહાકાર લઈ મળવા આવે છે
સાથે તરસ પણ અનરાધાર લઈ મળવા આવે છે

ઉતરવાનો જ નથી મારી આંખેથી નશો આજીવન
નજર નહિ સૈકા જુનો ખુમાર લઈ મળવા આવે છે

હે પ્રિયે હું તો સદા ઘાયલ થવાની રાહ લઈ બેઠો 
દાંત,નખ ને જીભ જેવી કટાર લઈ મળવા આવે છે 

અમથુ યે, સ્મરણ થઈ આવ્યુ મુજને વસંત ઋતનું 
ત્યાં તો ટહુકાજડીત અલંકાર લઈ મળવા આવે છે

બસ, અહિ જ અટકી જાય છે મારી કલમ ને શબ્દો
હૈયામાં લાગણી કેરો શણગાર લઈ મળવા આવે છે

પ્રેમ કરવા ને હોવી જોઈએ હિંમત જીગરમાં, યારો           
મન થાય છે ત્યારે ભર બજાર લઈ મળવા આવે છે

આમ તો એક જ ઠેકાણુ ને પુરતી છે એક નાની કેડી
છતાં રસ્તા નવલા એક હજાર લઈ મળવા આવે છે 

મારા જેવો પથ્થર થૈ થનગનતો ગાઈ ગીત 'હિતુ'
કોઈ, સંજીવની જેવો ઉપહાર લઈ મળવા આવે છે

ડો હિતેષ એ. મોઢા
26/12/2014