એક નવી સવાર થાય છે .......ડો હિતેષ એ. મોઢા

બારણુ ઉઘાડવાથી એક નવી સવાર થાય છે 
સપના ઘટાડવાથી એક નવી સવાર થાય છે

ધક્કા મારવાથી દુર થતો હશે ક'દી અંધકાર?
સુરજ ઉગાડવાથી એક નવી સવાર થાય છે. 

એમ બેસી રહેવાથી થતી હશે તીરથ જાત્રા!! 
ચરણ ઉપાડવાથી એક નવી સવાર થાય છે.

પંખીની પાંખમાં બેઠુ ઉડ્યન ફફડતુ ફડફડતુ
ગગન ઉડાવવાથી એક નવી સવાર થાય છે

આ હોવાના વહેમ ટાંગ્યા છે હર એક નગરમાં
ચહેરા ઉતારવાથી એક નવી સવાર થાય છે 

શાવર નીચે સ્નાન તો સાવ સંભવ ઘર ઘરમાં 
અષાઢે પલળવાથી એક નવી સવાર થાય છે 

સુરાહીમાં બંધ હોય તેને મદિરા ન કહેવાય?
અધરે અડાવવાથી એક નવી સવાર થાય છે

ખણો કે પછી ખોદો જખમ તો જખમ રહેવાનાં 
મલમ લગાડવાથી એક નવી સવાર થાય છે 

ચિક્કાર શબ્દો હોવાથી ગઝલ રચાય છે હિતુ?
હ્રદય  ધબકવાથી એક નવી સવાર થાય છે 


ડો હિતેષ એ. મોઢા
લખ્યા દિનાંક ૪-૧૨-૨૦૧૨